Ishami ry’Umuryango w’Abibumbye ryita ku buzima “OMS”, ryaburiye abatuye isi ko icyorezo cya COVID-19 gikomeje kwiyongera ku isi, inasaba ko nta kuregeza gukwiye kubaho.
Nubwo mu Burayi hari impinduka bigenda biba byiza, ku Isi ho si ko biri nk’uko byatangajwe n’Umuyobozi wa OMS, Tedros Adhanom Ghebreyesus. Ni mu kiganiro yagiranye n’itangazamakuru mu buryo bw’ikoranabuhanga i Genève ku wa Mbere w’iki cyumweru.
Yagize ati “Abantu bashya basaga 100 000 mu minsi icyenda ku icumi iheruka. Ku Cyumweru, hagaragaye kuzamuka kw’imibare, isaga 136 000 y’abarwayi bashya. Yanavuze ko ari umubare uri hejuru cyane ku munsi umwe”.
Todros yavuze ko hafi 75% by’abarwayi bashya babonetse ku Cyumweru ari abo mu bihugu 10, by’umwihariko ku mugabane w’Amerika na Aziya y’Amajyepfo. Yagaragaje ko hari ibihugu bigaragaza impinduka nziza mu kwirinda icyorezo cya Koronavirusi.
Yongeyeho ati “Igihangayikishije mu by’ukuri ni ukuregeza, guterera iyo. Abantu benshi ku Isi bashobora kwandura. Turi mu kwezi kwa gatandatu kuva iki cyorezo cyagaragara, si igihe cyo guterera iyo, si igihe cyo gutsimbura ikirenge”.
Kugeza ubu icyorezo cya COVID-19 kimaze guhitana abantu basaga 403 000 ku Isi guhera cyaduka mu Kuboza 2019 mu Bushinwa, abayirwaye bakaba basaga miriyoni 7 mu bihugu 196 n’intara nk’uko byatangajwe n’Ibiro ntaramakuru by’u Bufaransa. Nyuma y’agace k’Aziya y’uburasirazuba, u Burayi bwaribasiwe busa nk’indiri ya COVID-19, kuri ubu ikaba yibasiye Umugabane w’Amerika.
Imibare yashyizwe ahagaragara na OMS kugeza ejo hashize ni uko Leta Zunze Ubumwe z’Amerika ziza ku isonga aho abamaze kwandura bari 2 026 597, naho abamaze gupfa bari 113 061.
Brésil iza ku mwanya wa kabiri, ifite abanduye 710 887 n’abamaze gupfa 38 125. U Burusiya ni ubwa gatatu n’abanduye 476 658, hamaze gupfa 5 971, muri Espagne handuye 288 797 hapfa 27 136.
Ku mugabane w’Afurika ho hamaze kugaragara abantu 198 990 banduye Coronavirusi, abamaze gupfa ni 5 390 naho abakize ni 88 212. Afurika y’Epfo akaba ari cyo gihugu gifite abanduye benshi, 50 879 n’abamaze gupfa 1 080.
IHIRWE Chris
